2012年5月25日星期五

到藥房曬相

同大家講四個小故事。

食咗飯未

升降機內,師奶A同師奶B雞啄唔斷。

師奶A:食咗飯未呀?
師奶B:未呀...
(轉話題,講咗兩、三句其他嘢)
師奶A(又問):食咗飯未呀?
師奶B:未呀...

佢又真係面不改容照答架喎!

襯衫美學

喺The One睇中咗一條短褲,猶豫緊買唔買。

我:都唔知襯咩鞋好...
Sales:其實你而家呢對都OK呀,不過唔好係呢隻色,要襯啲暗啲嘅顏色!

咁即係呢對唔OK啦!

到藥房曬相


入到去,個男人問有咩幫到我。

我話:我想曬相...


會唔會crossover得太勁?!

巧令令~*


食糖水,服務員好好禮貌。

我:頭先落單嗰個人叫做「李巧玲」...
Derek:嘩,巧京京呀...

2012年5月21日星期一

危險人物


不是我容易相信別人,而是我比較相信遇到壞人是際遇的問題多於一切。

以上的橫額基本上問題不大,結交新朋友時確實應當小心,以防對方別有用心。但警署網頁確切地提到跟網友見面是很危險的事,有受害人因此被非禮,甚至被強姦,這個說法有以遍概全之嫌。

我想這樣一下子將網上交友定義為危險實在很荒謬,我和你不都是下班回家後會開著電腦瀏覽網頁的「網友」嗎?那我和你又是不是他們所說的危險人物?風化案什麼時候都可以發生,不只限於互聯網世界。什麼地方都會有色狼出現吧,最常見的不就是地鐵非禮案嗎?那是不是以後不要坐地鐵?

被別人貼上標籤固然不爽,不過自我標籤化的竟然大有人在。情況就像那些同性戀的會時常跟你強調「同性戀的圈子沒有真愛」,天啊,假如連你自己都戴著有色眼鏡去看自己,連你自己都不去相信,哪會有人願意一生一世配合你?異性戀的夫婦不是一樣會離婚嗎?不是一樣會有人背著另一半出外找一夜情嗎?這到底是那「圈子」的問題,還是個人本質的問題?

我相信世界上每一個角落,每個「圈子」都會有好人和壞人存在,遇到他們的機率跟見鬼的差不多,行好運時做什麼都是一帆風順,行霉運時你在如何聖潔的地方都會遇到骯髒的東西,怎都避不了。與其將自己放在框框,終日提心吊膽的渡日辰,何不嘗試撕去這些無謂的標籤,別讓自己活在絕望之中?

祝大家好運!

[圖片來源:香港警務處網頁]

2012年5月19日星期六

You-And-I Sex


Okay, maybe I need sex too...

But who doesn't?!

[Pictures grabbed from Friends DVD]

2012年5月14日星期一

(扮)熟客之46號客人


終於叫到45號飛,即刻行埋去向經理報到。殊不知有個貌似年過三十,手持46號飛嘅OL攝喺我前面,咩料呀,我咪大大聲講咗45號喺度囉,人哋都未叫到你...

被安排坐喺一邊長梳化,一邊擔凳仔嗰啲檯。隔嚟檯埋單,46號客人同佢娘親被安排坐喺我隔嚟檯。佢捉住經理傾咗一陣,懶熟咁,但聽落又唔覺佢哋真係好熟。

食完飯佢哋兩母女迫埋喺梳化嗰邊,手持iPhone擺到明就係準備搵人影相。有位女店員經過,好醒目咁問佢哋係咪要幫手,點知阿女話「唔係呀,唔係呀」,女店員無奈地行開。

我都估佢係想搵(佢以為)同佢好熟嗰位經理幫佢影,世事真係好奇秒,不出兩秒經理真係路過,阿女當然把握呢個咁好嘅機會,叫經理幫佢影。

此時手頭上冇嘢急緊嘅經理九秒九地叫住啱啱行開嘅女店員:「阿妹阿妹...呢度要影相呀...」

最後兩母女惟有認命,唔通同個經理講「妖,我叫你幫我影呀」咁咩。

P.S. 身處現場好笑十倍。

2012年5月11日星期五

個人口味

人嘅口味真係會隨時間轉變,從來唔飲有汽飲品嘅我,早幾日飲咗兩啖朋友嘅凍檸樂,第一個反應竟然係:「咦,幾好飲喎。」

話說我細個嗰陣完全唔鍾意食薯條,因為覺得咬爛晒之後一pat pat嗰種口感好核突,但係唔知幾時開始竟然愛上咗呢樣美食。

而家呢張header pic攝於2005年4月1日,嗰日我悠閒到喺屋企自己炸薯條...

2012年5月8日星期二

美心探險記

尋晚去九龍城探病,因為某啲原因得番我一個人食飯。

係我唔識搵,定係嗰頭真係冇嘢好食呢,最後屈服去咗我覺得好難食嘅美心快餐。從收銀去到斬料師傅,再由斬料師傅去到斟水俾我嗰個阿姐都好好禮貌,多謝前多謝後喎,加分。


好驚啲嘢會好難食,橫掂都係劣食,咁就梗係唔好食咁貴啦!結果叫咗全店第二平,$30嘅叉雞飯(最平係單併,$28)。估唔到又OK喎,叉燒好香蜜糖味,啲飯又冇煮過籠,典型燒味飯溫度,唔係熱到辣口,但至少唔係室溫狀態或者凍冰冰,合格。

一向都唔係好鍾意一個人喺街食飯,一來會覺得唔自在,二來隔嚟個阿姐可能會無啦啦喺度唱歌。


唱咗兩嘴之後佢就開始講電話,從對話中得悉佢呢期學緊唱歌,唔怪得咁好唱口啦。本諗住調位,但佢又唔係好大聲煩到震嗰啲,所以都係唔郁,聽下佢講電話都幾entertaining。

繼續食,食多兩啖就發現飯入面有異物...


呢條膠令我諗起之前美心綠茶藏甴曱事件,新聞話個女事主飲咗隻身長超過一厘米嘅甴曱入個口度...結果我一路食,一路心感不安,擔心食食下會發現一啲小生命。

幸運地我冇再見到異物(可能係吞咗落肚都唔知),$30嚟講叫做OK啦,唯一覺得唔好食嘅係碟冇味嘅薑蔥油,同埋佢個賣相真係好核突,好似啲奶壞咗,跟住結到一舊舊嗰啲樣。


最後我唔敢食咁乾淨,因為驚佢隻碟本身唔乾淨。收碟個阿姐又同我講「多謝晒」。


臨走去一趟洗手間先,細小嘅洗手間唔乾淨兼有一陣怪味,加上個水龍頭十問九唔應,扣分。


走人喇,又有人同我講「多謝晒拜拜」,真係一擔砂糖一擔屎喎!

後記
今朝肚痾,唔知關唔關事呢?

2012年5月2日星期三

很環保的人


我支持環保,但站在我的立場來說,環保是一種態度,將它說成責任似乎不太合適,我更不同意因要盲目地響應環保而影響了自己正常生活的運作。

舉例說,我贊成超市徵收環保徵費(膠袋稅),自備購物袋到超市並不是什麼難事,假如大量購物又不自備購物袋,令家中增添了無數膠袋反而會不知應如何處置;但說到便利店要徵收膠袋稅,我卻不太贊成。難道我到便利店買數杯雪糕、數包薯片是精心部署數天的事怖情嗎?逛街後想買零食回家大多是很突然的決定,我哪會有袋子在身上?便利店從此變得不便利。再者,拿回家的膠袋將會被循環再用,至少會成為盛載垃圾的垃圾袋(誰人都需要用垃圾袋吧),那為什麼要借收取所謂的環保徵費來給用膠袋的人冠以「不環保」之罪名?

最有趣的是當顧客感到不便的時候,店舖負責人都會跳過環保團體的「環保規條」,用一些更不環保的方法提供協助。

還記得有一次在樓下的OK便利店買了三瓶牛奶,我用沒手挽的透明膠袋(就像超市用來裝水果的那些,不用付膠袋稅)把它們包起,打算用手托著底拿回家。此時,熱誠的店員竟然很有禮貌的跟我說:「袋子很容易會穿的啊,我給你多一個...」話還沒有說完就拿出另一個透明袋,完全跟環保團體唱著反調,最後我給他解釋我會用另一隻手托著,所以沒問題...

最荒謬的莫過於那次我到郵局買郵票,每款按十的倍數購買,有些買五十個,有些買一百個。結賑時我問職員有沒有透明膠袋(以往一直都有提供,質料跟裝漫畫那些一樣,只是沒有黏貼口),他跟我說現在已經沒有提供了。我問他有沒有其他方法,我可不想拿著這七、八張大小不一的郵票在街上走,假若弄丟了任何一張都會造成過百損失啊!結果他給我一本超過三十頁,A4大小的郵費指南用來夾著貴重的郵票...

除了不小心的浪費,亦有明知故犯的浪費。

銀行老是叫人申請的電子月結單,我也有乖乖的申請。但回想起來,我不是每次都要列印出來核對嗎?那只是用我的紙還是銀行的紙的問題吧?那他們究竟是想節省成本還是推行環保?要是想環保的話倒不如不要每個月都寄那些借貸廣告給我吧,寄出、接收和棄掉這些沒用的東西才是真正的浪費啊!這些才是最應該關注的環保問題吧!

我再次重申,我絕對支持環保,但縮短洗澡時間到N分鐘、關燈N小時一類標榜著「我很環保」的活動實在無聊,洗乾淨的話就關水喉,不需要光線的時候的就關燈,這些才是最真實的環保舉動。實在受不了某些環保團體走了火入了魔般硬推環保,那些食素救地球之類的瘋癲活動真的不要預我的份兒。其實我們應該在文明(方便)與環保之間理智地找出一個中間點,凡事做得太誇張、太過火都不是一件好事吧!

且看那些很環保的人何時呼籲大家用毛巾擦屁股。
Related Posts Plugin for WordPress, Blogger...