我嘅預言應驗咗，關心妍嘅歌唱事業終於重上軌道，繼早前先後推出《失戀哲理》同埋《白費》兩首新歌，今晚又舉行咗《Neway Music Live》，新唱片《Pause》好快會推出。
可惜新歌《白費》再次出現歌詞唔完美嘅毛病，又夾雜住「瞓得著」同埋「扎醒」呢啲口語字眼，其實fine tune一下真係會好好多，不過「無謂在半夜扎醒突然想起你」呢句嘅意思又真係一刀刺中我呢類人嘅要害，一聽到個心即刻見痛。咦，改做「無謂在半夢半醒突然想起你」得唔得呢？
年頭嘅《聲》演唱會唱咗好多bma年代嘅舊歌，因為版權問題所以冇推出DVD。意料之內，今次大部份時間都係唱新公司嘅歌同埋人哋嘅歌，大概係為咗方便出DVD，唱片公司醒目地將唯一嘅四首bma作品放喺最後嘅假encore環節，當中包括我覺得melody好好聽，但為其歌詞粉碎式爛而感到可悲嘅《無痛失戀》(好難相信竟然係梁芷珊填詞)，每次聽到「來合唱聲勢像唱K」呢句我都會打個突。最估唔到嘅係竟然冇唱最經典嘅《你有心》...
一定會有人問我係咪又有免費飛，答案係冇嘅，張飛係我用K-FUN真FUN白銀換返嚟架！關心妍喎，絕對值得花少少錢/K-FUN喺佢身上！
話時話，乜bma啲版權費好貴架咩？係bma吊高嚟賣定係星娛樂冇錢買？
沒有留言:
發佈留言