2012年11月30日星期五

硬膠女(男)店員第三集-聖誕大餐

第二集:硬膠女店員續集-冇汁撈麵


終於有男店員出場。

其實呢間嘢嘅食物同環境真係唔錯,本想聖誕前夕約三五知己再去食餐聖誕飯,但又唔想食overpriced嘅聖誕大餐...

我:請問你哋23號有冇散嗌menu?定係淨係做聖誕set?
硬:我哋 主要 都係做聖誕set...

主要?咁係咪會有次要?係咪仲有得散嗌?

我:咁即係有冇得散叫?
硬:要睇下到時點...

到時會因應咩因素決定?大廚心情?天氣?當日恆指走勢?

我:咩叫「到時點」?咁我而家book 23號咁嚟到有冇得散嗌?
硬:......冇...

一早答冇咪得囉!嘥口水!

我:咁最近23號幾時仲有得散嗌?
硬:我哋嗰排都係做聖誕set...

咁嗰排即係邊排呀大佬?

我:咁即係幾多號之前有?
硬:你 預20號到 啦...

20號到,即係會有落差啦。仲要加多個「預」字,即係落差上再會有落差。

我:你不如俾個確實日子我好唔好?20號到即係幾多號?
硬:20號。
我:咁即係我20號之前就仲有得散嗌,係咪?
硬:係!

距離聖誕節仲有廿五日,距離我查詢嘅23號仲有廿三日,距離店員所講嘅20號仲有二十日,統統都唔夠一個月,好似仲未準備好咁。

為賺錢淨係接聖誕set,對散嗌嗰班客reject咪reject囉,所有嘢都仲係50/50、睇情況、大概,邊有可能唔專業到俾個uncertain嘅答案個客!咁基本嘅對答都唔識,執咗佢啦好冇?

5 則留言:

naruto 說...

問店長嘛,可能上面未比指示呢

Cat 說...

次次睇你D硬膠系列都好身同感受同好好笑!

Quincy Luk 說...

naruto:
我懷疑嗰條友已經係高層...

Cat:
多謝支持!我相信以而家啲人嘅服務質素,好快會有第四集!

SKII 說...

聖誕個 menu 而家應該有 ga la 喎...

Quincy Luk 說...

我諗聖誕menu佢好清楚,但對於唔想叫聖誕menu嘅客人,佢完全唔知應該點做。

Related Posts Plugin for WordPress, Blogger...