2012年4月29日星期日

夢醒時份之化妝掃

午飯時間,Joanne提到今朝俾佢細佬嘈醒咗。

Joanne:我細佬今朝掃跌咗我枝化妝掃,我成個人係嚇醒咗囉!佢仲要碌咗落床下底!

晚飯時間,再次講起呢個話題。

我:掃咗落床下底咁咪勁污漕囉,咁點算?
Joanne:洗番就可以啦...
我:呢o的可以用水洗架咩?
Joanne:都OK嘅...同埋我有另外一枝可以用...

















Joanne:咪住!我今朝用咗跌過落地嗰枝囉!佢整跌完之後我又瞓番,之後冇咗件事%^!$#^%$#&^&!*@

2012年4月26日星期四

到Zurich找尋單眼皮帥哥


同Amy分享咗一個有單眼皮靚仔嘅廣告,大家喺電話入面研究緊佢係咩地方嘅人。見到阿客嘅head office locates喺Zurich,但一時間又醒唔起Zurich喺邊樹喎。

我:Zurich即係邊度呀?
Amy:哦,好似係一間公司名嚟架...
我:唔係囉,係一個地方囉!
Amy:下?我記得有間公司係呢個名架喎...
(此時對方已經喺電話另一邊成功搜尋「Zurich」)
Amy(言之鑿鑿):咪係(公司名)囉~蘇黎世保險嘛~~~


View Larger Map

[Picture grabbed from IPAAT@Panoramio]

2012年4月24日星期二

匯豐全新自問自答服務

繼AEON多次打嚟提我找咭數,省卻咗我因遲交而要打去waive嘅時間之後,今次匯豐又提供咗一個好貼心嘅自問自答服務。

話說當年因為貪佢部Samsung數碼相機,所以同時申請咗兩張咭-一張Visa、一張MasterCard。事隔多年,相機已壞(其實係一早已壞),MasterCard已荒廢,唯一仲活躍緊嘅係張Visa咭。

早幾日收到張MasterCard嘅月結單,企圖收取$250年費,例牌又打去waive。我先同接電話嘅女同事講信用咭號碼,之後佢禮貌地同我講信用咭其實唔關佢個部門事,話幫我轉條線去相關部門。

之後接電話係一個男同事。我都未出聲,佢就已經一輪嘴:「收到同事通知,話陸先生想查詢番張MasterCard嘅年費,我哋啱啱已經幫先生做咗豁免...」

答得仲快過SimSimi隻雞。其實我乜嘢都未講,我好似連要waive都未講...

但成件事已經喺我提出要求之前完成咗。


2012年4月16日星期一

鈴鈴鈴...請問你家小狗在嗎?

話說好友Josephine嘅小狗包包好怕行雷,今日下晝雷電交加,包包一隻狗喺屋企應該會嚇破膽。

Josephine:
死啦~仲行雷添~
包包實嚇死啦~

我:
打俾佢叫佢唔駛驚

Josephine:
屋企電話冇插電呀

原來呢個先係真正嘅concern...

同場加映
叉燒包生日派對2012合照


完整相簿:叉燒包生日派對 (2012)

2012年4月13日星期五

生意難做

講咗幾十萬次我淨係需要打出同打入就已經可以,仲硬係要sell每月$146,合約期24個月嘅「eye家居平板電腦」。

好地地喺屋企做乜要用嗰舊嘢睇蘋果東方啫,我開電腦咪咩都有囉,出街對住部電話仲嫌隻眼唔夠辛苦咩。我修飾咗以上一番話婉拒咗。

之後阿顧客服務員竟然同我講話「呢部平板電腦有無限數據架喎」。


面對佢呢個selling point,我爭啲接唔到落去。我咪話咗唔會用囉,唔用的話數據限制仲係我嘅concern咩?!?!其實佢態度唔差,但佢似乎真係死唔斷氣,我唯有無奈地答:「其實,我屋企上網都係無限架囉...我相信你屋企都係架可?」

我好想話佢知我巴不得成個屋企電話cut鬼咗佢,仲同我講增值服務!

2012年4月12日星期四

我本來就是邪留丸王子


尋晚order咗呢個咁可愛嘅兒童餐,入面嗰兩粒楓糖香味/味道極重嘅雞蛋布甸將我徹底溶化...

話說我由細到大都好鍾意食布甸,細個嗰陣阿媽耐唔耐就會喺Sogo買嗰啲一袋十幾個嘅迷你布甸俾我食。讀小學嗰陣英文暑期班放學,我就會拉爺爺去超市買「統一雞蛋布丁」,仲記得嗰陣係有朱古力味架,大熱天時食凍冰冰嘅布甸簡直係一樂也!所以到我大個咗,每次喺電視見到邪留丸成日食布甸,我就會覺得佢好幸福。

峰壽司嘅員工們,如果你哋睇到呢篇blog entry的話,可唔可以send個悄悄話話俾我知你哋係一log log咁入貨,定係其實喺百佳已經可以買到呢隻咁美味可口嘅布甸呢?感謝。

2012年4月9日星期一

遙遠的她-蕭正楠


蕭正楠嘅歌聲嘅感染力真係唔簡單。呢條片,睇到我眼濕濕。

佢係唯一一個我儲齊晒佢所有唱片嘅香港男歌手。由錄音室去到表演現場,不論係自己定係別人嘅作品,佢都演繹得好好,尤其係情感運用,絕對可以用「一流」嚟到形容。

眼見關心妍最近嘅演唱會好評如潮,官恩娜又憑《超級巨聲》鹹魚翻生,兩位嘅實力喺近年終於得到認同,我衷心,衷心希望下一位會輪到蕭正楠...

佢唔再出唱片的話實在太可惜。

2012年4月8日星期日

More Than Customer Service - Fat Angelo's

心目中一直都有幾個晚餐好選擇,當中包括銅鑼灣伊利沙伯大廈Fat Angelo's。


食物同服務質素算係唔錯,但對我而言,環境舒服先至係最緊要。平時兩個人去的話,佢哋都好樂意提供一個可以坐到六個人嘅梳化位俾你,加上八點前所有drinks buy 1 get 1 free,喂,仲點會想去其他地方?

但好景不常,上個禮拜我赫然發現銅鑼灣呢間分店執咗(明明3月13號仲去緊)!

無奈地post咗一張以「長埋是你嗎 何以未講一聲就撇下我 回答吧 R.I.P. Fat Angelo's CWB...」為caption嘅相上Facebook,出於好奇心再將呢張相share咗上Fat Angelo's fan page,問佢哋會唔會再喺銅鑼灣開分店...點都估唔到佢哋真係用心地消化我post/share上去嘅每一個字,我除咗得到一個官方答案之外,仲得到一個好人性化嘅回應。


負責人竟然quote番歌詞答我「荼薇紅過都變枯枝 血肉之軀會沒法保持 唯獨春天可以給記住」!

雖然只係一句歌詞,但已經係做緊一樣more than customer service嘅工作。希望每一個客人都會記住佢哋嘅細心。

2012年4月7日星期六

黃伊汶佛法無邊感化收數佬

東方日報 12/10/2008


黃 伊 汶 ( Emme ) 近 個 月 不 斷 受 到 追 數 電 話 滋 擾 , 遭 粗 口 喪 鬧 , 高 峰 期 每 日 來 電 四 十 次 , Emme 則 以 播 佛 經 和 關 懷 問 候 , 成 功 令 追 數 佬 知 難 而 退 。

黃 伊 汶 ( Emme ) 近 日 被 收 數 公 司 追 債 港 幣 1200 元 , 並 日 夜 來 電 以 粗 口 騷 擾 。 昨 日 致 電 Emme 求 證 , 她 坦 言 被 追 數 佬 每 日 來 電 四 十 幾 次 「 問 候 」 和 追 債 : 「 其 實 係 我 家 菲 傭 為 同 鄉 做 擔 保 , 同 鄉 走 佬 後 , 追 數 公 司 於 是 打 電 話 騷 擾 , 污 言 穢 語 梗 有 , 最 初 我 家 菲 傭 關 咗 電 話 鈴 聲 , 但 其 實 掩 耳 盜 鈴 , 我 決 定 要 正 視 和 解 決 呢 件 事 。 」

消 除 怨 氣
Emme 親 自 接 聽 追 數 佬 來 電 , 與 對 方 對 質 , 解 釋 事 件 與 自 己 無 關 , 亦 勸 對 方 不 要 浪 費 時 間 去 追 數 , 建 議 他 做 有 意 義 的 事 情 , 例 如 傳 道 : 「 佢 講 乜 都 夾 雜 一 大 堆 粗 口 , 咁 嘅 表 達 能 力 , 反 映 佢 生 活 好 有 問 題 , 所 以 我 去 同 佢 傾 偈 。 ( 成 功 嗎 ? ) 唔 成 功 , 所 以 我 改 為 播 佛 經 畀 佢 聽 , 希 望 減 低 怨 氣 , 結 果 播 咗 十 幾 次 之 後 , 無 再 打 電 話 嚟 。 」 雖 然 追 數 佬 沒 有 再 來 電 騷 擾 , 但 似 乎 不 是 Emme 的 怪 招 奏 效 , 而 是 債 仔 的 家 人 出 面 解 決 。

文 : 專 案 組
- - - - - - - -
睇咗咁多次都仲係覺得好好笑...

2012年4月1日星期日

前程錦繡

擇自舊同學Xanga嘅一篇舊文章...(其他人名會用英文字母代替)

「呢兩年入面, 可以誇張D講係由細到大返學以黎最開心既時光, 可以一大班同學一齊食飯一齊做PROJECT一齊放學後去唱K去玩, 即使我同其餘7個同學未必真係個個都咁多野講咁fd我都覺得好開心, 可以成為佢地其中一份子我已經好滿足, 因為我係好喜歡一大班人好WARM咁聚埋一起果種感覺。

Quincy係我迎新日第一個識既同班同學, 我仲記得佢o係當日介紹左隻佢用開既暗瘡膏俾我, 雖然第一日我覺得佢好怪但之後我發覺佢係越來越有趣XD R係o係第一日正式上堂, 我記得係電腦堂, lunch時我問佢一唔一齊食飯THEN就JOIN埋我地喇, 其後都係3個男丁一齊食飯, B就成日都自己係飯堂食跟住去圖書館, 有一日我地覺得成日都只係得3個麻甩佬都唔係辦法, 點都要搵D女仔一齊, 就唔知點解由我去問S佢地3個去唔去唱K, 點知被拒絕, 之後退求其次搵個肥既女仔去點之都係食檸檬, 我真係7到冇朋友-.- 幾日後S 3個主動叫埋我地一齊食加上N都肯出, 自此就有7個人喇。year2....第8個人G加入, 佢係因為留班而插入我地果班, 當初我亦覺得佢好怪但其後都接受左佢。呢兩年黎發生過好多好多既笑料, 主要都係拎R黎取笑, 我都會加埋把口, 雖然係好衰, 但真係好搞笑XD

考試最後一日, 一班人包括我去左BBQ, 跟住去食糖水, 最後quincy講左一句『前程錦繡』就各自散去...」

已經唔係第一次翻睇,淨係睇第一段已經想拍手認同。

一路睇,以前嘅歡樂片段一路喺腦裡面浮現,但個心竟然覺得痛。

嗰種懷念夾雜住心酸嘅感覺係難以言喻...

Related Posts Plugin for WordPress, Blogger...